മാലിന്യമുക്തം നവകേരളം പദ്ധതിയുടെ നിയോജകമണ്ഡലതല സംഘാടകസമിതി രൂപീകരണയോഗം സെപ്റ്റംബര് 29ന് വെള്ളിയാഴ്ച രാവിലെ 10.30ന് ചേരുമെന്ന് ഗവ.ചീഫ് വിപ്പ് ഡോ.എന്.ജയരാജ് അറിയിച്ചു. കേരള സര്ക്കാരിന്റെ ഭാഗമായി നമ്മുടെ നാട്ടിലെ മാലിന്യ സംസ്കരണ പ്രവര്ത്തനങ്ങള് സമഗ്രവും ശാസ്ത്രീയവുമാക്കുക എന്ന ലക്ഷ്യത്തോടെ ഈ വര്ഷം ആരംഭിച്ചിരിക്കുന്ന പദ്ധതിയാണ് മാലിന്യമുക്തം നവകേരളം. ഇതിന്റെ ഭാഗമായി കാഞ്ഞിരപ്പള്ളി നിയോജകമണ്ഡലത്തിലും ക്ലീന് കാഞ്ഞിരപ്പള്ളി - ഗ്രീന് കാഞ്ഞിരപ്പള്ളി എന്ന പദ്ധതി ആവിഷ്കരിച്ചിരിക്കുന്നതില് ജനകീയ പങ്കാളിത്തം ഉറപ്പാക്കുന്നതിനാണ് യോഗം ചേരുന്നത്.
കാഞ്ഞിരപ്പള്ളി നിയോജകമണ്ഡലത്തിലെ 9 പഞ്ചായത്തുകളിലെയും മാലിന്യ സംസ്കരണ പ്രവര്ത്തനങ്ങള് ഏകോപിപ്പിക്കുന്നതിനും 2023 ഡിസംബര് 31 ന് മാലിന്യമുക്ത മണ്ഡലമായി കാഞ്ഞിരപ്പള്ളി നിയോജകമണ്ഡലത്തെ പ്രഖ്യാപിക്കുന്നതിനുമാണ് ലക്ഷ്യമിടുന്നത്. ചിറക്കടവ് ഗ്രാമപഞ്ചായത്ത് ഓഫീസ് കെട്ടിടത്തിലെ ഓഡിറ്റോറിയത്തില് ചേരുന്ന സംഘാടക സമിതി രൂപീകരണയോഗത്തില് ത്രിതല പഞ്ചായത്ത് അധ്യക്ഷര്,
ജനപ്രതിനിധികള്, വിവിധ രാഷ്ട്രീയ പാര്ട്ടി പ്രതിനിധികള്, സന്നദ്ധ പ്രവര്ത്തകര്, വ്യാപാരി വ്യവസായി സംഘടനാ പ്രതിനിധികള്, ഉദ്യോഗസ്ഥര്, മാലിന്യ സംസ്കരണവുമായി ബന്ധപ്പെട്ട് പ്രവര്ത്തിക്കുന്ന റിസോഴ്സ് പേഴ്സണുകള്, കുടുംബശ്രീ ഭാരവാഹികള്, സര്ക്കാരിന്റെ വിവിധ മിഷനുകളുടെ ചുമതലക്കാര്, റസിഡന്സ് അസോസിയേഷന് പ്രതിനിധികള്, സമുദായ നേതാക്കള് ഉള്പ്പെടെ വിവിധ വിഭാഗം ജനങ്ങള് കണ്വെന്ഷനില് പങ്കെടുക്കും.
