വാഴൂർ : വാഴൂർ ഗവൺമെൻറ് ഹൈസ്കൂളിൽ ഡ്രീംസ് @2023 ത്രിദിന ക്യാമ്പ് സമാപിച്ചു. സ്കൂളിലെ തന്നെ വിദ്യാർത്ഥികൾക്ക് വേണ്ടി സംഘടിപ്പിച്ച മൂന്ന് ദിവസ ക്യാമ്പ് വ്യത്യസ്തമായ പരിപാടികളിലൂടെയാണ് കടന്നുപോയത്. വേനലവധിക്കാലത്ത് കുട്ടികൾ സ്മാർട്ട് ഫോണിൻറെ പുറകെ നിൽക്കുമ്പോൾ അതിൽ നിന്ന് മാറി, കുട്ടികളുടെ സർഗാത്മകത വളർത്തിയെടുക്കുകയും അവരെ സമൂഹത്തിന് പരിചയപ്പെടുത്തി കൊടുക്കാവുന്ന തരത്തിലുള്ള വ്യത്യസ്തമായ വിനോദ, വിജ്ഞാന പ്രോഗ്രാമുകൾ കോർത്തിണക്കിക്കൊണ്ട് ക്യാമ്പ് മനോഹാരിതമാക്കുകയായിരുന്നു. അഞ്ചാം ക്ലാസ് മുതൽ ഹൈസ്കൂൾ വരെയുള്ള കുട്ടികൾക്കായിരുന്നു ക്യാമ്പ്.
തുടർന്ന് വെണ്മണി സ്കൂളിലെ അധ്യാപകനായ സജി ജേക്കബ് ചിത്രകലയുടെ പ്രസക്തിയും പരിശീലനവും എന്ന വിഷയത്തെ ആസ്പദമാക്കി കുട്ടികൾക്ക് ചിത്രകല , ക്രാഫ്റ്റ് പരിശീലനം എന്നിവയിൽ ഊന്നിയ ക്ലാസ് നയിച്ചു. രണ്ടാം ദിവസം ക്ലിനിക്കൽ സൈക്കോളജിസ്റ്റായ സുബിത മോട്ടിവേഷണൽ ക്ലാസ് എടുത്തു.
തുടർന്ന് കാഞ്ഞിരപ്പള്ളി പേട്ട ഗവർമെൻറ് ഹൈസ്കൂൾ അധ്യാപകൻ ജയ്സൺ തോമസ് കാഴ്ച പരിമിതിയെ നേരിടുന്ന മാർഗങ്ങളെപറ്റിയും, ബ്രെയിൽ ലിപിയെ പറ്റിയും ക്ലാസെടുത്തു.തുടർന്ന് സ്കൂളിലെ മലയാള അധ്യാപകനായ പി ഹരികുമാർ നാടക കളരിക്ക് തുടക്കം കുറിച്ചു.മൂന്നാം ദിവസം നാടക കളരിയുടെ ഭാഗമായി നാലു ഗ്രൂപ്പുകളായി തിരിച്ച് കുട്ടികൾ തന്നെ കഥയും തിരക്കഥയും സംഭാഷണവും തയ്യാറാക്കി രംഗത്ത് അവതരിപ്പിച്ചത് ക്യാമ്പിനെ വ്യത്യസ്തമാക്കി.അവസാന ദിവസം മെഗാക്വിസും ക്യാമ്പ് അവലോകനവും നടന്നു.
