Memorial Fellowship: ‘സിനിമയിലെ പൊളിറ്റിക്കൽ കറക്ട്‌നെസ്- അനിവാര്യതയും അധികവായനയും’-ഫെലോഷിപ്പിന് രാജേഷ് കെ എരുമേലി അര്‍ഹനായി

 

മാധ്യമം ദിനപത്രത്തിലെ സീനിയർ റിപ്പോർട്ടറായിരുന്ന ജി.രാജേഷ് കുമാറിന്റെ സ്മരണയ്ക്കായി ജി. രാജേഷ് കുമാർ സുഹൃദ് സംഘം ഏർപ്പെടുത്തിയ ഫെലോഷിപ്പിന് രാജേഷ് കെ എരുമേലി അര്‍ഹനായി. ‘സിനിമയിലെ പൊളിറ്റിക്കൽ കറക്ട്‌നെസ്- അനിവാര്യതയും അധികവായനയും’ എന്ന വിഷയത്തില്‍ ഗ്രന്ഥം തയ്യാറാക്കുന്നതിന് 25,000 രൂപയാണ് ഫെലോഷിപ്പ്. 

സംവിധായകനും എഴുത്തുകാരനുമായ മധുപാല്‍, മാധ്യമപ്രവര്‍ത്തകനും ചലച്ചിത്രനിരൂപകനുമായ എ. ചന്ദ്രശേഖര്‍, അഭിനേത്രി ജോളി ചിറയത്ത്, മാധ്യമപ്രവര്‍ത്തകരായ ടി.എം. ഹര്‍ഷന്‍, മനീഷ് നാരായണന്‍, സംവിധായിക ഇന്ദു വി.എസ്, തിരക്കഥാകൃത്ത് സജീവ് പാഴൂര്‍ എന്നിവരടങ്ങുന്ന ജൂറിയാണ് വിജയിയെ നിശ്ചയിച്ചത്. 

ഗൗരവചിന്തയോടെ സിനിമയെ കാണുകയും വിലയിരുത്തുകയും ചെയ്യുന്ന ആസ്വാദകവൃന്ദം കേരളത്തില്‍ സജീവമാണെന്ന് തെളിയിക്കുന്നതാണ് ഫെലോഷിപ്പിന് ലഭിച്ച അപേക്ഷകരുടെ എണ്ണവും വൈവിധ്യവും. 

അന്തിമ പരിഗണനയില്‍ എത്തിയവരില്‍ നിന്നാണ് ജൂറി വിജയിയെ തെരഞ്ഞെടുത്തത്.