വാഴൂര് ഗവ.ഹൈസ്കൂളിന് 2 കോടി രൂപയുടെ പുതിയ കെട്ടിടം ഉദ്ഘാടനം ജൂലൈ നാലിന് വൈകുന്നേരം 3 മണിക്ക് വിദ്യാഭ്യാസ വകുപ്പ് മന്ത്രി വി.ശിവന്കുട്ടി ഉദ്ഘാടനം ചെയ്യുമെന്ന് ഗവ.ചീഫ് വിപ്പ് ഡോ.എന്.ജയരാജ് അറിയിച്ചു. 110 വര്ഷത്തിലധികം പഴക്കമുള്ള ഈ സ്കൂളിന് മെച്ചപ്പെട്ട ഭൗതിക സാഹചര്യങ്ങള് ലഭ്യമാക്കുന്നതിന് എം എല് എ സര്ക്കാരിന് നിവേദനം സമര്പ്പിക്കുകയും നബാര്ഡ് സ്കീമില് ഉള്പ്പെടുത്തി സര്ക്കാര് തുക അനുവദിക്കുകയും ചെയ്തിരുന്നു.
ആദ്യഘട്ടമായിട്ടുള്ള ഭാഗമാണ് ഇപ്പോള് പൂര്ത്തിയാക്കിയിരിക്കുന്നത്. 7200 ചതുരശ്ര അടി വിസ്തൃതിയില് 6 ക്ലാസ് മുറികള് സ്റ്റാഫ് റൂമുകള്, ലാബുകള്, ടോയിലെറ്റ് ബ്ലോക്ക് എന്നിവയാണ് ഉള്പ്പെടുത്തിയിരിക്കുന്നത്.
ബാക്കി സൗകര്യങ്ങള് കൂടി എം എല് എ ഫണ്ട്, വിദ്യാഭ്യാസ വകുപ്പ് ഫണ്ട് എന്നിവ അനുവദിച്ച് പൂര്ത്തിയാക്കുന്നതിന് നടപടികള് നടന്നുവരുന്നുണ്ട്. നിലവില് പൂര്ത്തിയായ കെട്ടിടത്തിന്റെ നിര്മ്മാണ ചുമതല പൊതുമരാമത്ത് വകുപ്പിനായിരുന്നു. സ്കൂള് ഗ്രൗണ്ടില് നടക്കുന്ന വിപുലമായ ഉദ്ഘാടന ചടങ്ങില് ഗവ.ചീഫ് വിപ്പ് ഡോ.എന്.ജയരാജ് അധ്യക്ഷനാകും. പത്തനംതിട്ട എംപി ആന്റോ ആന്റണി മുഖ്യപ്രഭാഷണം നടത്തും.
കോട്ടയം ജില്ലാപഞ്ചായത്ത് പ്രസിഡണ്ട് കെ വി ബിന്ദു, വാഴൂര് ബ്ലോക്ക് പഞ്ചായത്ത് പ്രസിഡണ്ട് മുകേഷ് കെ മണി, വാഴൂര് ഗ്രാമപഞ്ചായത്ത് പ്രസിഡണ്ട് വി പി റജി, വിവിധ ജനപ്രതിനിധികള്, രാഷ്ട്രീയ സാംസ്കാരിക പ്രവര്ത്തകര്, രക്ഷിതാക്കള് എന്നിവര് പങ്കെടുക്കും.
