Vazhoor24x7 Special | 08-06-2026 By: Arun Kumar S
ഫിലിപ്പീൻസ്: ഫിലിപ്പീൻസിന്റെ തെക്കൻ മേഖലയെ നടുക്കി റിക്ടർ സ്കെയിലിൽ 8.1 തീവ്രത രേഖപ്പെടുത്തിയ ശക്തമായ ഭൂചലനം. ബ്ലൂംബെർഗ് ആണ് ഇക്കാര്യം റിപ്പോർട്ട് ചെയ്തത്. ഭൂകമ്പത്തിന് പിന്നാലെ ഫിലിപ്പീൻസ് അധികൃതർ സുനാമി മുന്നറിയിപ്പ് പുറപ്പെടുവിച്ചു. തീരമേഖലയിലെ ജനങ്ങളെ അടിയന്തരമായി സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിക്കുന്നുണ്ട്.
സാമൂഹിക മാധ്യമങ്ങളിൽ പ്രചരിക്കുന്ന ദൃശ്യങ്ങൾ ഞെട്ടിക്കുന്നതാണ്. ശക്തമായ കുലുക്കത്തിൽ ബഹുനില കെട്ടിടങ്ങൾ കടലാസ് പോലെ നിലംപൊത്തുന്ന വീഡിയോകൾ പുറത്തുവന്നു. ഒരു സ്കൂളിന് പുറത്ത് നിന്നുള്ള ദൃശ്യങ്ങളിൽ, മുൻകരുതലിന്റെ ഭാഗമായി മൈതാനത്ത് നിർത്തിയിരുന്ന കുട്ടികൾ നോക്കിനിൽക്കെ സ്കൂൾ കെട്ടിടത്തിന്റെ ഒരു ഭാഗം തകർന്നു വീഴുന്നത് കാണാം.
.jpeg)
പ്രഭവകേന്ദ്രം മിന്ദനാവോ: ഫിലിപ്പീൻസിന്റെ തെക്ക് ഭാഗത്തുള്ള മിന്ദനാവോ ദ്വീപിന് സമീപമാണ് ഭൂചലനത്തിന്റെ പ്രഭവകേന്ദ്രമെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. പ്രധാന ഭൂകമ്പത്തിന് മണിക്കൂറുകൾക്കകം 6.1 തീവ്രതയുള്ള ശക്തമായ തുടർചലനവും ഉണ്ടായി.
ഒരാൾ മരിച്ചു, നാല് പേർക്ക് പരിക്ക്: നിലവിൽ ലഭ്യമായ വിവരം അനുസരിച്ച് ഒരാൾ മരണപ്പെടുകയും നാല് പേർക്ക് പരിക്കേൽക്കുകയും ചെയ്തു. കൂടുതൽ നാശനഷ്ടങ്ങൾക്കും സുനാമിക്കും സാധ്യതയുണ്ടെന്ന് അധികൃതർ മുന്നറിയിപ്പ് നൽകി.
3 മീറ്റർ സുനാമി ഭീഷണി: പസഫിക് സുനാമി മുന്നറിയിപ്പ് കേന്ദ്രത്തിന്റെ കണക്ക് പ്രകാരം ഫിലിപ്പീൻസ് തീരത്ത് 3 മീറ്റർ വരെ ഉയരത്തിൽ തിരമാലകൾ ആഞ്ഞടിക്കാം. കൂടാതെ ഇന്തോനേഷ്യ, മലേഷ്യ എന്നീ രാജ്യങ്ങളുടെ തീരങ്ങളിൽ ഒരു മീറ്റർ വരെ ഉയരമുള്ള തിരമാലകൾക്കും സാധ്യതയുണ്ട്.ഇതിന്റെ ഭാഗമായി തീരദേശവാസികളെയും ആശുപത്രികളിലെയും സ്കൂളുകളിലെയും ആളുകളെയും സുരക്ഷിത സ്ഥാനങ്ങളിലേക്ക് മാറ്റുന്ന നടപടികൾ പുരോഗമിക്കുകയാണ്.
