Vazhoor24x7 | 2026 ജൂൺ 19, l By: SVG
കറുകച്ചാൽ: വായനയാണ് യുവതലമുറയെ ലഹരിയിൽ നിന്ന് രക്ഷിക്കാനുള്ള ഏറ്റവും നല്ല മാർഗമെന്ന് ജില്ലാ പഞ്ചായത്ത് മെമ്പർ അജിത്ത് മുതിരമല.
ചങ്ങനാശ്ശേരി താലൂക്ക് ലൈബ്രറി കൗൺസിലിന്റെ ആഭിമുഖ്യത്തിൽ കങ്ങഴ മുണ്ടത്താനം ലിറ്റിൽ ഫ്ലവർ വിദ്യാനികേതൻ ആൻഡ് ജൂനിയർ കോളജിൽ നടന്ന വായന പക്ഷാചരണം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
"യുവാക്കളെയും യുവതികളെയും വഴിതെറ്റിക്കുന്ന ലഹരിയിൽ നിന്ന് മുക്തമാക്കാൻ ഏറ്റവും നല്ല ലഹരി വായനയാണ്. അതിലൂടെ സാമൂഹിക അന്തരീക്ഷം നിലനിർത്താൻ സാധിക്കും," അജിത്ത് മുതിരമല പറഞ്ഞു. ചടങ്ങിൽ പി എൻ പണിക്കർ, കെ ദാമോദരൻ, ഐ വി ദാസ് എന്നിവരുടെ പേരിൽ അക്ഷര മരം നട്ടു. എസ്ബിഐ ഇടയിരിക്കപ്പുഴ ബ്രാഞ്ച് മാനേജർ ജോസ് മാത്യു പരിസ്ഥിതി പ്രവർത്തകൻ കെ ബിനുവിന് വൃക്ഷത്തൈ കൈമാറി.
താലൂക്ക് സെക്രട്ടറി ജോസ് ചമ്പക്കര സ്വാഗതവും താലൂക്ക് വൈസ് പ്രസിഡണ്ട് എം ഇബ്രാഹിംകുട്ടി നന്ദിയും പറഞ്ഞു. താലൂക്ക് ജോയിൻ സെക്രട്ടറി ഷറഫുദ്ദീൻ സാഹിബ്, ജില്ലാ എക്സിക്യൂട്ടീവ് കമ്മിറ്റി അംഗങ്ങളായ ബിജു എബ്രഹാം, എ വി പ്രതീഷ് എന്നിവർ ആശംസകൾ അർപ്പിച്ചു.
