Vazhoor24x7 | 2026 ജൂൺ 15, l By: SVG
പൊൻകുന്നം: കേരളത്തിലെ മുഴുവൻ ബസുകളിലും സ്ത്രീകൾക്ക് സൗജന്യ യാത്ര അനുവദിക്കണമെന്ന് ആവശ്യപ്പെട്ട് മഹിളാ മോർച്ച കോട്ടയം ഈസ്റ്റ് ജില്ലാ കമ്മിറ്റി പൊൻകുന്നം KSRTC ബസ് സ്റ്റാൻഡിന് മുൻപിൽ പ്രതിഷേധ ധർണ നടത്തി. ബിജെപി കോട്ടയം ഈസ്റ്റ് ജില്ലാ ജനറൽ സെക്രട്ടറി അഖിൽ രവീന്ദ്രൻ ധർണ ഉദ്ഘാടനം ചെയ്തു.പ്രകടന പത്രികയിൽ നൽകിയ വാഗ്ദാനം ലംഘിച്ച് ജനങ്ങളെ വഞ്ചിക്കുന്ന സർക്കാരായി UDF മാറിയെന്ന് അഖിൽ രവീന്ദ്രൻ കുറ്റപ്പെടുത്തി. കേരളത്തിലെ സ്ത്രീകളെ UDF സർക്കാർ അപഹസിക്കുകയാണെന്നും അദ്ദേഹം ആരോപിച്ചു.
ഓർഡിനറി ബസുകളെ ഒറ്റരാത്രി കൊണ്ട് സിറ്റി ഫാസ്റ്റ് ആക്കി മാറ്റി സ്ത്രീകൾക്ക് സൗജന്യ യാത്ര നിഷേധിക്കുന്ന സർക്കാർ നിലപാടിനെതിരെ ശക്തമായ സമരവുമായി മുന്നോട്ട് പോകുമെന്ന് അദ്ദേഹം പറഞ്ഞു.സംസ്ഥാനത്തെ KSRTC ബസുകളിൽ എല്ലാ സ്ത്രീകൾക്കും സൗജന്യ യാത്ര നൽകുമെന്നായിരുന്നു തിരഞ്ഞെടുപ്പ് പ്രചാരണ വേളയിൽ കോൺഗ്രസ് നേതാക്കൾ പ്രഖ്യാപിച്ചത്.
എന്നാൽ അധികാരത്തിൽ വന്ന ശേഷം സർക്കാർ വാഗ്ദാനം പാലിക്കുന്നതിൽ പരാജയപ്പെട്ടുവെന്ന് അഖിൽ രവീന്ദ്രൻ കൂട്ടിച്ചേർത്തു. ബിജെപി ജില്ലാ വൈസ് പ്രസിഡന്റ് ജയ ബാലചന്ദ്രൻ അധ്യക്ഷത വഹിച്ചു. ജില്ലാ സെക്രട്ടറി ജി. ഹരിലാൽ, മഹിളാ മോർച്ച ജില്ലാ പ്രസിഡന്റ് മഞ്ജു പ്രദീപ്, ജില്ലാ വൈസ് പ്രസിഡന്റ് വിജിത ദിലീപ്, പുതുപ്പള്ളി മണ്ഡലം പ്രസിഡന്റ് ടിന്റു മനോജ്, ജില്ലാ സെക്രട്ടറി സിന്ധു മുരുകൻ, ഉഷ ശ്രീകുമാർ തുടങ്ങിയവർ സംസാരിച്ചു.
