ജൂലൈ 1 ദേശീയ ഡോക്ടേഴ്സ് ദിനം. ഡോ. ബിധാൻ ചന്ദ്ര റോയിയുടെ ഓർമ്മയിൽ ആഘോഷിക്കുന്ന ഈ ദിവസം, വാഴൂരിന്റെയും ചുറ്റുമുള്ള നാട്ടുകാരുടെയും ആരോഗ്യ സംരക്ഷണത്തിന് പിന്നിൽ പ്രവർത്തിക്കുന്ന ഡോക്ടർമാരെ ഓർക്കാം. നിസ്വാർത്ഥ സേവനവും കഠിനാധ്വാനവും കൊണ്ട് സമൂഹത്തിന് ആരോഗ്യം പകരുന്ന ഡോക്ടർമാരോടുള്ള കടപ്പാട് പ്രകടിപ്പിക്കാനുള്ള ദിവസമാണിത്.പ്രളയത്തിലും മഹാമാരിയിലും ഉറക്കമൊഴിഞ്ഞ് രോഗികൾക്കൊപ്പം നിന്നവരാണ് നമ്മുടെ ഡോക്ടർമാർ. രോഗം മാത്രമല്ല, രോഗിയുടെ ഭയവും ഉത്കണ്ഠയും മാറ്റുന്നവർ. ഓരോ ജീവൻ രക്ഷിക്കുമ്പോഴും അവർ നൽകുന്നത് പ്രതീക്ഷയാണ്.
വാഴൂർ സർക്കാർ ആശുപത്രി, താലൂക്ക് ആശുപത്രികൾ, ക്ലിനിക്കുകൾ എന്നിവിടങ്ങളിൽ രാവിലെ മുതൽ രാത്രി വരെ രോഗികളെ കാണുന്ന ഡോക്ടർമാർ. പനി, ഡെങ്കി, കാലവർഷ രോഗങ്ങൾ എന്നിവ പെരുകുന്ന ഈ സമയത്ത് അവരുടെ സേവനം കൂടുതൽ വിലപ്പെട്ടതാണ്.വാഴൂർ പ്രാഥമിക ആരോഗ്യ കേന്ദ്രത്തിലെ ഡോക്ടർമാർ ഹോമിയോ ഡിസ്പൻസറിയിലെ ഡോക്ടർ,ആയൂർവേദആശുപത്രിയിലെ ഡോക്ടർമാർ. സ്വകാര്യ ആശുപത്രിയിലെ ഡോക്ടർമാർ. ഇവരുടെയൊക്കെ നിസ്വാർത്ഥ സേവനങ്ങളെ ഈ ദിവസം നമുക്ക് ഓർക്കാം
കോവിഡ് കാലത്തിന് ശേഷം ഡോക്ടർമാരുടെ പങ്ക് സമൂഹം കൂടുതൽ തിരിച്ചറിഞ്ഞു. മാനസിക പിരിമുറുക്കം, ജോലിഭാരം, അക്രമങ്ങൾ എന്നിവയെ അതിജീവിച്ചാണ് അവർ സേവനം തുടരുന്നത്.
ആശുപത്രികളിൽ പോകുമ്പോൾ ഡോക്ടർമാരോട് ക്ഷമ കാണിക്കാം. അവരുടെ ഉപദേശങ്ങൾ ശരിയായി പാലിക്കാം. വ്യാജ ചികിത്സകളിൽ നിന്നും ഓൺലൈൻ തട്ടിപ്പുകളിൽ നിന്നും ജാഗ്രത പാലിക്കാം. സ്റ്റെതസ്കോപ്പിന്റെ ശബ്ദത്തിലൂടെ ജീവൻ തിരികെ കൊണ്ടുവരുന്നവർ. അവർക്ക് ഒരു 'നന്ദി' പറയാൻ ഈ ദിവസം ഉപയോഗിക്കാം.
