ന്യൂഡല്ഹി: നീറ്റ് യുജി പരീക്ഷാ ചോര്ച്ച വിവാദത്തില് കേന്ദ്ര സര്ക്കാരിനെതിരെ രൂക്ഷ വിമര്ശനവുമായി സുപ്രീംകോടതി. ആവര്ത്തിച്ചുണ്ടാകുന്ന തെറ്റുകള് അവസാനിപ്പിക്കണമെന്നും 'ഇത് ഇങ്ങനെയങ്ങ് മുന്നോട്ട് കൊണ്ടുപോകാന് അനുവദിക്കില്ല' എന്നും ജസ്റ്റിസുമാരായ പി.എസ്. നരസിംഹ, അലോക് ആരാധെ എന്നിവരടങ്ങിയ ബെഞ്ച് വ്യക്തമാക്കി. പരീക്ഷാ വിവാദങ്ങളിലെ പിഴവുകള് തടയണമെന്ന് ആവശ്യപ്പെട്ട കോടതി, ഈ വിഷയത്തെ വളരെ സൂക്ഷ്മമായി നിരീക്ഷിക്കുമെന്നും അറിയിച്ചു.
അതേസമയം കോക്രോച്ച് ജനതാ പാര്ട്ടി പ്രതിനിധികളുമായി ഇന്ന് കേന്ദ്രസര്ക്കാര് നടത്തിയ ചര്ച്ച പൂര്ത്തിയായി. കേന്ദ്ര വിദ്യാഭ്യാസ മന്ത്രി രാജി വെക്കണമെന്ന വിദ്യാര്ഥികളുടെ ആവശ്യത്തില് നാളെ ഉച്ചയ്ക്ക് തീരുമാനം അറിയിക്കാമെന്ന് സര്ക്കാര് അറിയിച്ചതായി വിദ്യാര്ഥികള് വ്യക്തമാക്കി.
കോക്രോച്ച് ജനതാ പാര്ട്ടി സമരവുമായി ബന്ധപ്പെട്ട് ഡല്ഹിയില് 200 പേരെ പോലീസ് കരുതല് കസ്റ്റഡിയിലെടുത്തു. സമരത്തിന് കുരുമുളക് സ്പ്രേയുമായി എത്തിയവരും ഗുണ്ടാ സംഘങ്ങളുമാണ് കസ്റ്റഡിയിലായതെന്ന് പോലീസ് അറിയിച്ചു. യു.പി, രാജസ്ഥാന്, ഹരിയാന, പഞ്ചാബ് എന്നിവിടങ്ങളില് നിന്ന് എത്തിയ വിദ്യാര്ത്ഥികള് അല്ലാത്തവരെയാണ് കൂടുതലായും കസ്റ്റഡിയിലെടുത്തതെന്നും പോലീസ് വ്യക്തമാക്കി.
