ഡൽഹി: ഫൂക്കറ്റിൽ നിന്ന് ഡൽഹിയിലേക്ക് വരികയായിരുന്ന എയർ ഇന്ത്യയുടെ AI2379 വിമാനത്തിൽ ചൊവ്വാഴ്ച ശക്തമായ എയർ ടർബുലൻസ്. ശക്തമായ കാറ്റിനെ തുടർന്ന് വിമാനം വലിയ രീതിയിൽ ആടിയുലഞ്ഞ് ഏകദേശം 300 അടി താഴേക്ക് പതിക്കാൻ പോയെങ്കിലും പൈലറ്റിന്റെ സമയോചിതമായ ഇടപെടലിലൂടെ ഡൽഹി വിമാനത്താവളത്തിൽ സുരക്ഷിതമായി ലാൻഡ് ചെയ്തു.
അപകടത്തിൽ ചില യാത്രക്കാർക്കും ക്രൂ അംഗങ്ങൾക്കും പരിക്കേറ്റു. വിമാനത്തിൽ പെട്ടെന്ന് അൾട്ടിറ്റ്യൂഡ് ഡ്രോപ്പ് ഉണ്ടായപ്പോൾ ഒരു ക്യാബിൻ ക്രൂ അംഗത്തിന് ഗുരുതരമായും മറ്റൊരു ക്രൂ അംഗത്തിനും ചില യാത്രക്കാർക്കും നിസ്സാര പരിക്കേൽക്കുകയും ചെയ്തതായി പൈലറ്റ് അറിയിച്ചതായി ഡിജിസിഎ വ്യക്തമാക്കി. വിമാനം ശക്തമായ കാറ്റിൽപ്പെട്ടതായി എയർ ഇന്ത്യയും ഡിജിസിഎയും സ്ഥിരീകരിച്ചു.
ഡൽഹി വിമാനത്താവളത്തിൽ അടിയന്തരമായി ലാൻഡ് ചെയ്ത ശേഷം അവിടെ വെച്ച് തന്നെ പരിക്കേറ്റവർക്ക് അടിയന്തര വൈദ്യസഹായം നൽകി. ഗുരുതരമായി പരിക്കേറ്റ ക്രൂ അംഗത്തെ വിദഗ്ദ്ധ പരിശോധനകൾക്കായി ആശുപത്രിയിലേക്ക് മാറ്റുകയും ചെയ്തു.
