ട്രാവൻകൂർ സിമന്റ്സ് പുനരാരംഭിക്കും? സർക്കാരിന്റെ ഉന്നതതല യോഗം

തിരുവനന്തപുരം: കോട്ടയം നാട്ടകം ആസ്ഥാനമായി പ്രവർത്തിക്കുന്ന ട്രാവൻകൂർ സിമന്റ്സ് ലിമിറ്റഡിന്റെ പ്രവർത്തനം വീണ്ടും തുടങ്ങാനുള്ള സാധ്യതകൾ സംബന്ധിച്ച് ഉന്നതതല ചർച്ച നടന്നു. നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ, വ്യവസായ വകുപ്പ് മന്ത്രി പി.കെ. കുഞ്ഞാലിക്കുട്ടി എന്നിവരുടെ നേതൃത്വത്തിലാണ് നിയമസഭാ മന്ദിരത്തിലെ സ്പീക്കറുടെ ഓഫീസിൽ യോഗം ചേർന്നത്. 2026 ഏപ്രിലിൽ പ്രവർത്തനം നിലച്ച കമ്പനിയുടെ നിലവിലെ സ്ഥിതിയും പ്രവർത്തനം പുനരാരംഭിക്കുന്നതിന് തടസ്സമാകുന്ന സാങ്കേതിക പ്രശ്നങ്ങളും യോഗത്തിൽ വിശദമായി വിലയിരുത്തി. കമ്പനി നേരിടുന്ന പ്രതിസന്ധികളെക്കുറിച്ച് മാനേജിംഗ് ഡയറക്ടറിൽ നിന്നും മറ്റ് ഉദ്യോഗസ്ഥരിൽ നിന്നും വിവരങ്ങൾ ആരാഞ്ഞു. പരമ്പരാഗത രീതികളിൽ നിന്ന് മാറി സ്ഥാപനത്തെ നിലനിർത്തുന്നതിനുള്ള പുതിയ സാധ്യതകൾ പരിശോധിച്ച് റിപ്പോർട്ട് നൽകാൻ വ്യവസായ വകുപ്പ് അഡീഷണൽ ചീഫ് സെക്രട്ടറിയോട് യോഗത്തിൽ നിർദ്ദേശിച്ചു. ട്രാവൻകൂർ സിമന്റ്സിനെ സംരക്ഷിക്കുന്നതിന് സാധ്യമായ എല്ലാ ക്രിയാത്മക നടപടികളും സർക്കാർ സ്വീകരിക്കുമെന്ന് വ്യവസായ ഐടി വകുപ്പ് മന്ത്രി യോഗത്തിൽ വ്യക്തമാക്കി.