`കട്ടപ്പനയിൽ ആംബുലൻസ് അപകടം; രോഗിക്ക് ദാരുണാന്ത്യം, മൂന്നുപേർക്ക് പരിക്ക്`

കട്ടപ്പനയിൽ ആംബുലൻസ് അപകടം; രോഗി മരിച്ചു, മൂന്നു പേർക്ക് പരിക്ക് കട്ടപ്പന: രോഗിയുമായി പോയ ആംബുലൻസ് നിയന്ത്രണം വിട്ട് അപകടത്തിൽപ്പെട്ട് രോഗി മരിച്ചു. അണക്കര സ്വദേശി മറ്റത്തിൽ എൻ.കെ രാജനാണ് മരിച്ചത്. ഇന്ന് പുലർച്ചെയായിരുന്നു അപകടം. ശ്വാസംമുട്ടലിനെ തുടർന്ന് അണക്കര അൽഫോൺസ് ആശുപത്രിയിൽ ചികിത്സയിലായിരുന്നു രാജൻ. നില ഗുരുതരമായതിനെ തുടർന്ന് കട്ടപ്പനയിലെ ആശുപത്രിയിലേക്ക് മാറ്റുന്നതിനിടെ കട്ടപ്പന പുളിയൻമല സംസ്ഥാന പാതയിൽ വെച്ചാണ് ആംബുലൻസ് അപകടത്തിൽപ്പെട്ടത്.

 നിയന്ത്രണം വിട്ട ആംബുലൻസ് റോഡിൽ നിന്ന് തെന്നിമാറി സമീപത്തെ സംരക്ഷണ ഭിത്തിയിൽ ഇടിച്ചുകയറുകയായിരുന്നു. ഇടിയുടെ ആഘാതത്തിൽ ആംബുലൻസിന്റെ മുൻഭാഗം പൂർണമായും തകർന്നു. വാഹനത്തിലുണ്ടായിരുന്ന രാജന്റെ കൂട്ടിരിപ്പുകാരായ രണ്ടു പേർക്കും ഡ്രൈവർക്കും പരിക്കേറ്റു. ഇവരെ കട്ടപ്പനയിലെ ആശുപത്രിയിൽ പ്രവേശിപ്പിച്ചു. പരിക്കേറ്റവരുടെ നില ഗുരുതരമല്ലെന്ന് ആശുപത്രി അധികൃതർ അറിയിച്ചു. ഡ്രൈവർ ഉറങ്ങിപ്പോയതാണ് അപകട കാരണമെന്നാണ് പൊലീസിന്റെ പ്രാഥമിക നിഗമനം. സംഭവത്തിൽ പൊലീസ് അന്വേഷണം ആരംഭിച്ചു.