weather update kerala today: ചക്രവാതചുഴിയും ന്യൂനമര്‍ദ്ദവും; സംസ്ഥാനത്ത് മഴ കനക്കും, വിവിധ ജില്ലകള്‍ക്ക് മുന്നറിയിപ്പ്

തെക്ക് - പടിഞ്ഞാറന്‍ മധ്യപ്രദേശിനും തെക്ക് - കിഴക്കന്‍ രാജസ്ഥാനും വടക്ക് - കിഴക്കന്‍ ഗുജറാത്തിനും മുകളിലായി ചക്രവാതചുഴി നിലനില്‍ക്കുന്നു. മധ്യ - പടിഞ്ഞാറന്‍ ബംഗാള്‍ ഉള്‍ക്കടലിനും വടക്ക് - പടിഞ്ഞാറന്‍ ബംഗാള്‍ ഉള്‍ക്കടലിനും മുകളിലായി മറ്റൊരു ചക്രവാതചുഴി കൂടി സ്ഥിതി ചെയ്യുന്നു.

അതേസമയം കോട്ടയം ജില്ലയിൽ രാവിലെ മുതൽ മഴയാണ്. മലയോരമേഖലകളിൽ ഇടവില്ലാതെ മഴ പെയ്തു കൊണ്ടിരിക്കുകയാണ്. പല പ്രദേശങ്ങളിലും നേരിയ തോതിൽ കാറ്റുമുണ്ട്.

ജൂലൈ 24 ഓടെ വടക്ക് - പടിഞ്ഞാറന്‍ ബംഗാള്‍ ഉള്‍ക്കടലിനും മധ്യ - പടിഞ്ഞാറന്‍ ബംഗാള്‍ ഉള്‍ക്കടലിനും മുകളിലായി ഒഡിഷ - ആന്ധ്രാപ്രദേശ് തീരത്തിനു സമീപം പുതിയൊരു ന്യൂനമര്‍ദ്ദം രൂപപ്പെടാന്‍ സാധ്യതയുണ്ട്. ചക്രവാതചുഴികളുടെയും ന്യൂനമര്‍ദ്ദത്തിന്റെ സ്വാധീനത്താല്‍ കേരളത്തില്‍ വ്യാപകമായ മഴയ്ക്കും ഒറ്റപ്പെട്ട സ്ഥലങ്ങളില്‍ ശക്തമായ മഴയ്ക്കും സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു.

ഇന്ന് ഇടുക്കി, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍ഗോഡ് ജില്ലകളില്‍ യെല്ലോ അലര്‍ട്ടാണ്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് ഈ ജില്ലകളില്‍ പ്രവചിച്ചിരിക്കുന്നത്. ശക്തമായ കാറ്റിനും സാധ്യതയുണ്ട്. വടക്കന്‍ ജില്ലകളിലും മലയോര മേഖലകളിലും ഉള്ളവര്‍ അതീവ ജാഗ്രത പാലിക്കുക.