കാഞ്ഞിരപ്പള്ളി സ്വദേശിയായ യുവാവിനെ പീഡനമടക്കം ആറോളം വ്യാജ കേസുകളിൽ പെടുത്തിയ യുവതിക്കെതിരെ പൊൻകുന്നം പോലീസ് ജാമ്യമില്ലാ വകുപ്പ് പ്രകാരം കേസ് രജിസ്റ്റർ ചെയ്തു. പൊൻകുന്നത്ത് സ്ഥിരതാമസമാക്കിയ യുവതിക്കെതിരെയാണ് കേസ്. ഇവർ കാഞ്ഞിരപ്പള്ളി സ്വദേശിയായ സന്ദീപിനെയാണ് കള്ളക്കേസിൽ കുടുക്കിയത്.
വിവാഹ വാഗ്ദാനം നൽകി തട്ടിപ്പു നടത്തിയതിനു യുവതിക്കെതിരെ 2022 ജൂണിൽ സന്ദീപ് പരാതി നൽകിയിരുന്നു. ബാങ്ക് ഓഫ് ബറോഡയിൽ ജോലി ചെയ്യുന്ന ഇവർ വ്യാജരേഖ ചമച്ചാണ് ജോലിയിൽ പ്രവേശിച്ചതെന്നും പരാതിയിൽ സന്ദീപ് പറഞ്ഞിരുന്നു.പരാതിയിൽ അന്വേഷണം വന്ന് പിടിക്കപ്പെടാൻ സാധ്യതയുണ്ട് എന്ന് മനസ്സിലാക്കിയതോടെ യുവാവിനെതിരെ യുവതി വ്യാജ പീഡന പരാതി നൽകുകയും യുവാവിനെ ജയിലിൽ ആക്കുകയും ചെയ്തു. ജാമ്യത്തിൽ ഇറങ്ങിയ യുവാവ് വീണ്ടും യുവതിക്കെതിരെ നിയമ പോരാട്ടം തുടങ്ങിയതോടെ സ്ത്രീ സംരക്ഷണ നിയമത്തെ കൂട്ടുപിടിച്ച് വ്യാജ കേസുകൾ കെട്ടിച്ചമച്ചു. ആറു കേസുകളിൽ പ്രതിയായ യുവാവിനെ ഗുണ്ടാ ലിസ്റ്റിൽ പെടുത്താൻ പോലീസിലും സ്വാധീനം ചെലുത്തി.
മുണ്ടക്കയത്തുള്ള ഗുണ്ടകളെ വീട്ടിൽ പറഞ്ഞുവിട്ടു ഭീഷണിപ്പെടുത്തിയത് സംബന്ധിച്ചും ആദ്യ വിവാഹം നിലനിൽക്കെ സന്ദീപിനെ വിവാഹം കഴിച്ചതായി വ്യാജ രേഖകൾ ഉണ്ടാക്കി ബാങ്ക് ഓഫ് ബറോഡയിൽ നിന്നും പണം തട്ടിയാതായും കാഞ്ഞിരപ്പള്ളി പോലീസിൽ യുവാവ് പരാതി നൽകിയിരുന്നു. ഇത് യുവതിയുടെ സ്വാധീനത്തിൽ ഒതുക്കി തീർക്കാൻ ശ്രമിച്ചുവെന്നും സന്ദീപ് ആരോപിക്കുന്നു. സത്യം പുറത്തുവരുന്നത് വരെ നിയമ പോരാട്ടം തുടരുമെന്ന് സന്ദീപ് പത്രസമ്മേളനത്തിൽ പറഞ്ഞു.
