മലയാളി താരം സഞ്ജു സാംസണിന്റെ ഉജ്ജ്വലമായ ഇന്നിംഗ്സാണ് ഇന്ത്യയെ ചരിത്ര സ്കോറിലേക്ക് നയിച്ചത്. ഓപ്പണിംഗ് ജോഡികളായ സഞ്ജു സാംസണും അഭിഷേക് ശർമയും ആദ്യ രണ്ട് ഓവറുകളിൽ 12 റൺസ് മാത്രം നേടി പതുക്കെയാണ് തുടങ്ങിയതെങ്കിലും പിന്നീട് താളം കണ്ടെത്തിയതോടെ ന്യൂസിലൻഡ് ബൗളർമാർ സമ്മർദ്ദത്തിലായി. ആദ്യ നാല് പന്തുകളിൽ റണ്ണെടുക്കാൻ സാധിച്ചില്ലെങ്കിലും അഞ്ചാം പന്തിൽ സിക്സറടിച്ചാണ് സഞ്ജു ഇന്ത്യയുടെ സ്കോർ ബോർഡ് ചലിപ്പിച്ചു തുടങ്ങിയത്. പവർപ്ലേ ഓവറുകളിൽ തകർത്തടിച്ച ഇരുവരും ആറ് ഓവറിൽ 92 റൺസ് അടിച്ചുകൂട്ടിക്കൊണ്ട് ടി20 ലോകകപ്പ് ചരിത്രത്തിലെ ഏറ്റവും മികച്ച പവർപ്ലേ സ്കോർ എന്ന റെക്കോർഡ് ഇന്ത്യയുടെ പേരിൽ കുറിച്ചു.
