road accident: വാഗമൺ റൂട്ടിൽ കെ.എസ്.ആർ.ടി.സി ബസ്സും ട്രാവലറും കൂട്ടിയിടിച്ചു; ഡ്രൈവറുടെ നില ഗുരുതരം

 ഈരാറ്റുപേട്ട: ഈരാറ്റുപേട്ട-വാഗമൺ റൂട്ടിൽ തീക്കോയി വെള്ളികുളത്തിന് സമീപം കെ.എസ്.ആർ.ടി.സി ബസ്സും ട്രാവലറും കൂട്ടിയിടിച്ച് അപകടം സംഭവിച്ചു. അപകടത്തിൽ ഏഴുപേർക്ക് പരിക്കേറ്റു. ഇതിൽ ട്രാവലർ ഡ്രൈവറുടെ നില അതീവ ഗുരുതരമാണ്. മണിമലയിൽ നിന്നും വന്ന ട്രാവലറാണ് അപകടത്തിൽപ്പെട്ടത്. വെള്ളികുളത്തിന് സമീപം ഇഞ്ചപ്പാറ എന്ന സ്ഥലത്തെ ഇറക്കമിറങ്ങി വന്ന ട്രാവലർ, കയറ്റം കയറി വരികയായിരുന്ന ബസ്സിലേക്ക് ഇടിച്ചു കയറുകയായിരുന്നു. ഇടിയുടെ ആഘാതത്തിൽ ട്രാവലറിന്റെ മുൻഭാഗം പൂർണ്ണമായും തകർന്നു.

വാഹനത്തിനുള്ളിൽ കുടുങ്ങിക്കിടന്ന ഡ്രൈവറെ ഏറെ നേരത്തെ പരിശ്രമത്തിനൊടുവിൽ മുൻഭാഗം വെട്ടിപ്പൊളിച്ചാണ് പുറത്തെടുത്തത്. ഈരാറ്റുപേട്ടയിൽ നിന്നുള്ള ഫയർഫോഴ്സും, സന്നദ്ധ സംഘടനകളായ നന്മക്കൂട്ടം, ടീം റെസ്ക്യൂ ഫോഴ്സ് പ്രവർത്തകരും നാട്ടുകാരും ചേർന്നാണ് രക്ഷാപ്രവർത്തനങ്ങൾ നടത്തിയത്. പരിക്കേറ്റവരെ ഉടൻ തന്നെ ഈരാറ്റുപേട്ടയിലെ സൺറൈസ്, പി.എം.സി ആശുപത്രികളിൽ പ്രവേശിപ്പിച്ചു. അപകടത്തെത്തുടർന്ന് ഈ റൂട്ടിൽ ഗതാഗതം തടസ്സപ്പെട്ടു.