Vazhoor24x7 | 09-06-2026 By: സജി ജോർജ് വട്ടപ്പാറ
മിനിമം ചാർജ് 50 രൂപയാക്കണം; എച്ച്എംഎസ് നേതൃത്വത്തിൽ ധർണ
മലപ്പുറം: ഇന്ധന വില വർധനവിന്റെ പശ്ചാത്തലത്തിൽ ഓട്ടോറിക്ഷ ചാർജ് അടിയന്തരമായി വർധിപ്പിക്കണമെന്ന് ആവശ്യപ്പെട്ട് ഓൾ കേരള സ്വതന്ത്ര ഓട്ടോ തൊഴിലാളി യൂണിയന്റെ നേതൃത്വത്തിൽ ജൂൺ 10-ന് ബുധനാഴ്ച രാവിലെ 10 മണിക്ക് സെക്രട്ടേറിയറ്റിന് മുന്നിൽ മാർച്ചും ധർണയും നടത്തും.എച്ച്എംഎസ് സംസ്ഥാന ജനറൽ സെക്രട്ടറി ടോമി മാത്യു മാർച്ച് ഉദ്ഘാടനം ചെയ്യും. പെട്രോൾ, ഡീസൽ, ഗ്യാസ് വില ദിനംപ്രതി വർധിക്കുന്ന സാഹചര്യത്തിലും 2022-ൽ നിശ്ചയിച്ച നിരക്കിലാണ് തൊഴിലാളികൾ ഇപ്പോഴും സർവീസ് നടത്തുന്നതെന്ന് യൂണിയൻ ഭാരവാഹികൾ പറഞ്ഞു.
ഇന്ധന വില വർധനവ് മൂലം സംസ്ഥാനത്തെ 8 ലക്ഷത്തോളം ഓട്ടോ തൊഴിലാളികളും അവരുടെ 40 ലക്ഷത്തോളം വരുന്ന കുടുംബാംഗങ്ങളും കടുത്ത സാമ്പത്തിക പ്രതിസന്ധി നേരിടുന്നതായി യൂണിയൻ ചൂണ്ടിക്കാട്ടി.ആവശ്യങ്ങൾ: മിനിമം ചാർജ് 50 രൂപയായും പിന്നീടുള്ള ഓരോ കിലോമീറ്ററിനും 25 രൂപയായും വർധിപ്പിക്കണം.
സർക്കാർ നിശ്ചയിക്കുന്ന നിരക്ക് തൊഴിലാളികൾക്ക് ലഭിക്കും എന്നുറപ്പാക്കുന്ന തരത്തിൽ വിജ്ഞാപനത്തിൽ വ്യക്തത വരുത്തണം. കൂടാതെ സി എഫ്, ക്ഷേമനിധി, അനധികൃത സർവീസ്, പാർക്കിംഗ് സൗകര്യം തുടങ്ങിയ വിഷയങ്ങളും ചർച്ച ചെയ്ത് പരിഹരിക്കണമെന്ന് യൂണിയൻ ആവശ്യപ്പെട്ടു.
