കാഞ്ഞിരപ്പള്ളി: കാഞ്ഞിരപ്പള്ളിയുടെ പ്രിയ എം.എൽ.എയും സെന്റ് ഡൊമിനിക്സ് കോളേജ് അധ്യാപകനുമായ പ്രൊഫ. റോണി കെ. ബേബിക്ക് കാഞ്ഞിരപ്പള്ളിയിൽ മാത്രമല്ല, തിരുവനന്തപുരം നിയമസഭയിലും ശിഷ്യർ. പാലക്കാട് എം.എൽ.എ രമേഷ് പിഷാരടിയും വൈക്കം എം.എൽ.എ കെ. ബിനിമോനും റോണി സാറിന്റെ പഴയ വിദ്യാർത്ഥികളാണ്.
തലയോലപ്പറമ്പ് ദേവസ്വം ബോർഡ് കോളേജിൽ ബി.എ പൊളിറ്റിക്കൽ സയൻസ് വിദ്യാർത്ഥിയായിരുന്നു പിഷാരടി. "അന്നേ കലയുടെ ലോകത്തിലായിരുന്ന പിഷാരടിയെ ക്ലാസിൽ കാണുന്നത് അപൂർവമായിരുന്നു. എന്നാൽ രാഷ്ട്രതന്ത്ര ശാസ്ത്ര വിഷയത്തിലെ ശ്രദ്ധയും പുതിയ കാര്യങ്ങൾ അറിയാനുള്ള ആഗ്രഹവും എന്നെ അത്ഭുതപ്പെടുത്തി" എന്ന് റോണി സാർ ഫേസ്ബുക്കിൽ കുറിച്ചു.
വൈക്കം സെന്റ് സേവ്യേഴ്സ് കോളേജിൽ ബി.എ ഇക്കണോമിക്സ് വിദ്യാർത്ഥിയായിരുന്നു ബിനിമോൻ. കോളേജിലെ കെ.എസ്.യു നേതാവായിരുന്ന അദ്ദേഹം എതിർപക്ഷത്തിന്റെ കോട്ടയിൽ നിന്നും യൂണിവേഴ്സിറ്റി യൂണിയൻ കൗൺസിലറായി ജയിച്ചത് ഇന്നും ഓർക്കുന്നതായി റോണി സാർ പറയുന്നു."അധ്യാപന ജീവിതത്തിലെ പ്രിയപ്പെട്ട വിദ്യാർത്ഥികളോടൊപ്പം ഒരേ പ്രസ്ഥാനത്തിന്റെ ഭാഗമായി കേരള നിയമസഭയിലെത്താൻ കഴിഞ്ഞതിൽ വലിയ സന്തോഷമുണ്ട്" - റോണി കെ. ബേബി.
