സംസ്ഥാനത്തെ ആദ്യ ഓൺലൈൻ ഗ്രാമസഭ ചരിത്രം കുറിച്ച് വാഴൂർ

 വാഴൂർ: തദ്ദേശ സ്വയംഭരണ രംഗത്ത് പുതിയ ചരിത്രം കുറിച്ച് വാഴൂർ ഗ്രാമപഞ്ചായത്ത്. സംസ്ഥാനത്ത് തന്നെ ആദ്യമായി ഓൺലൈൻ പങ്കാളിത്തത്തോടെയുള്ള ഗ്രാമസഭ ചാമംപതാൽ വാഴൂർ മുസ്‌ലീം ജമാഅത്ത് മദ്രസാ ഹാളിൽ സംഘടിപ്പിച്ചു.പത്താം വാർഡ് ടി.പി പുരത്തെ ഗ്രാമസഭയിലാണ് ഈ ഡിജിറ്റൽ മാതൃക പരീക്ഷിച്ചത്. നേരിട്ടെത്താൻ സാധിക്കാത്തവർക്കും വിദേശത്തുള്ള പ്രവാസികൾക്കും ഗൂഗിൾ മീറ്റ് വഴി പങ്കെടുക്കാൻ അവസരം ലഭിച്ചു. ക്യു.ആർ കോഡ് വഴിയാണ് ഓൺലൈൻ സംവിധാനം സജ്ജീകരിച്ചത്.

കാഞ്ഞിരപ്പള്ളി എം.എൽ.എ പ്രൊഫ. റോണി കെ. ബേബി ഗ്രാമസഭ ഉദ്ഘാടനം ചെയ്തു. "സാങ്കേതികവിദ്യയുടെ സാധ്യതകൾ ജനകീയ ആസൂത്രണത്തിൽ പ്രയോജനപ്പെടുത്തുന്നത് ജനാധിപത്യ പ്രക്രിയയെ ശക്തമാക്കും" എന്ന് അദ്ദേഹം പറഞ്ഞു.

ഗ്രാമപഞ്ചായത്ത് പ്രസിഡന്റ് പ്രൊഫ. എസ്. പുഷ്കലാദേവി അധ്യക്ഷത വഹിച്ചു. ജില്ലാ ജോയിന്റ് ഡയറക്ടർ ട്രീസ, പഞ്ചായത്ത് സെക്രട്ടറി എം. സൗമ്യ, വാർഡ് മെമ്പർ റംഷാദ് റഹ്മാൻ, പഞ്ചായത്ത് അംഗങ്ങൾ എന്നിവർ പങ്കെടുത്തു. ലോകത്തിന്റെ വിവിധ കോണുകളിൽ നിന്ന് നിരവധി പ്രവാസികൾ ഗ്രാമസഭയിൽ ഡിജിറ്റലായി പങ്കാളികളായി.