വാഴൂർ: കെ.കെ റോഡിൽ ഇളപ്പുങ്കൽ ജംഗ്ഷന് സമീപം അമിത വേഗതയിലെത്തിയ വാഹനം വഴിയരികിൽ നിൽക്കുകയായിരുന്ന യുവാവിനെ ഇടിച്ച് കടന്നുകളഞ്ഞു. കൊടുങ്ങൂർ അമ്പാട്ടുപടി സ്വദേശിക്കാണ് തലയ്ക്കും കാലിനും ഗുരുതര പരുക്കേറ്റത്.
പരുക്കേറ്റ യുവാവിനെ ഉടൻ സ്വകാര്യ ആശുപത്രിയിൽ പ്രവേശിപ്പിച്ചു. തുടർ ചികിത്സക്കായി മെഡിക്കൽ കോളേജിലേക്ക് മാറ്റി. ഇടിച്ച വാഹനം നിർത്താതെ കെ.കെ റോഡിൽ നിന്ന് കാനം ഭാഗത്തേക്ക് തിരിഞ്ഞ് പോയതായി ദൃക്സാക്ഷികൾ പറഞ്ഞു.
കൊടുങ്ങൂരിനും ഇളപ്പുങ്കൽ ജംഗ്ഷനും ഇടയിൽ വാഹനാപകടങ്ങൾ തുടർക്കഥയാകുകയാണ്. വഴിവിളക്കുകൾ ഇല്ലാത്തതും ഉള്ളവയ്ക്ക് വെളിച്ചക്കുറവുള്ളതും വഴിയാത്രക്കാർക്ക് നടക്കാൻ പറ്റാത്ത വിധം വഴിയരികിൽ വാട്ടർ അതോറിറ്റിയുടെ പൈപ്പുകൾ കൂട്ടിയിട്ടിരിക്കുന്നതും അപകട സാധ്യത വർധിപ്പിക്കുന്നതായി നാട്ടുകാർ പരാതിപ്പെടുന്നു.
എത്രയും വേഗം അധികൃതർ ഇടപെട്ട് ഒരു ജീവൻ പോലും നഷ്ടപ്പെടാതിരിക്കാൻ നടപടി സ്വീകരിക്കണമെന്ന് പ്രദേശവാസികൾ ആവശ്യപ്പെട്ടു. കൂടുതൽ വിവരങ്ങൾ ലഭ്യമായിട്ടില്ല.
