പെൻഷൻ ഇനി ബാങ്ക് അക്കൗണ്ടിലേക്ക്: DBT നിർബന്ധമാക്കി സർക്കാർ ഉത്തരവ്

 തിരുവനന്തപുരം: സംസ്ഥാനത്തെ സാമൂഹ്യ സുരക്ഷാ, ക്ഷേമനിധി ബോർഡ് പെൻഷനുകൾ ഇനി നേരിട്ട് ബാങ്ക് അക്കൗണ്ടിലേക്ക്. പൂർണമായും കിടപ്പുരോഗികളായ ഗുണഭോക്താക്കളെ ഒഴിച്ചുള്ള എല്ലാവർക്കും ഡയറക്ട് ബെനിഫിറ്റ് ട്രാൻസ്ഫർ (DBT) സംവിധാനത്തിലൂടെ ആധാറുമായി ബന്ധിപ്പിച്ച ബാങ്ക് അക്കൗണ്ടിലേക്ക് പെൻഷൻ നൽകുന്നതിന് സർക്കാർ ഉത്തരവായി. നിലവിൽ സഹകരണ സംഘങ്ങൾ വഴി വീടുകളിലെത്തി പെൻഷൻ വിതരണം ചെയ്യുന്ന രീതിയാണ് ഉള്ളത്. 

വിതരണം ചെയ്യാത്ത തുകകൾ തിരിച്ചടയ്ക്കുന്നതിലെ കാലതാമസം, സേവന പോർട്ടലിലെ രേഖപ്പെടുത്തലുകളിലെ പൊരുത്തക്കേടുകൾ, അർഹതയില്ലാത്തവർക്കും ഒരേ വ്യക്തിക്ക് ഒന്നിലധികം തവണയും പെൻഷൻ ലഭിക്കുന്ന സാഹചര്യം എന്നിവ ഒഴിവാക്കുന്നതിന്റെ ഭാഗമായാണ് പുതിയ തീരുമാനം. 

കേന്ദ്ര സർക്കാരിന്റെ ഡിബിടി നിർദേശങ്ങൾ പൂർണമായി പാലിക്കാത്തതിനെ തുടർന്ന് കേന്ദ്ര ധനസഹായം നഷ്ടപ്പെടുന്ന സാഹചര്യം ഒഴിവാക്കാനും ഈ നടപടി ലക്ഷ്യമിടുന്നു. കിടപ്പുരോഗികൾക്ക് മാത്രം നിലവിലെ സംവിധാനം തുടരും.