kanjirapally news update: കാഞ്ഞിരപ്പള്ളിയിൽ ചിറ്റാർപുഴയിൽ കുളിക്കുവാൻ ഇറങ്ങിയ യുവാവ് ഒഴുക്കിൽപ്പെട്ട് കാണാതായി

 

കാഞ്ഞിരപ്പള്ളി ചിറ്റാർ  പുഴയിലെ  ചെക്ക് ഡാം കവിഞ്ഞു ശക്തമായ ഒഴുക്കുണ്ടായിരുന്ന സമയത്ത്, ചെക്ക് ഡാമിന്റെ മുകളിലൂടെ സാഹസികമായി നടക്കുവാൻ ശ്രമിച്ച യുവാവ് കാൽതെറ്റി പുഴയിൽ വീണ് കാണാതായി .   ചിറ്റാർ  പുഴയിൽ  ചിറക്കടവ് മൂന്നാം മൈൽ സെന്റ്  ഇഫ്രേംസ് യു.പി. സ്കൂളിന് മുൻപിലുള്ള വട്ടക്കല്ല്  ചെക്ക് ഡാമിൽ കുളിക്കുവാൻ ഇറങ്ങിയ യുവാവാണ് സുഹൃത്തുക്കൾക്ക് മുൻപിൽ  സാഹസികത കാണിക്കുവാൻ ശ്രമിച്ച്  ഒഴുക്കിൽപ്പെട്ട് കാണാതായത് . 

ഞായറാഴ്ച  വൈകുന്നേരം മൂന്ന് മണിയോടെ ആയിരുന്നു സംഭവം.  പാലാ വലവൂർ ഇളംതോട്ടത്തിൽ അരുൺ ചന്ദ്രൻ - (29) ആണ് ഒഴുക്കിൽപ്പെട്ട് കാണാതായത്. കാഞ്ഞിരപ്പള്ളി ഫയര്‍ ഫോഴ്‌സും , ഈരാറ്റുപേട്ട ടീം എമര്‍ജന്‍സിയും,  പൊന്‍കുന്നം പോലീസും, നാട്ടുകാരും ചേർന്ന് സ്ഥലത്തു തിരച്ചിൽ നടത്തിയെങ്കിലും യുവാവിനെ കണ്ടെത്താനായില്ല. രാത്രി വൈകീയതോടെ വെളിച്ചകുറവ് മൂലം തിരച്ചിൽ നിർത്തി. തിങ്കളാഴ്ച  രാവിലെ വീണ്ടും തിരച്ചിൽ തുടരും