വാഴൂർ: വാഴൂർ ഗ്രാമപഞ്ചായത്ത് പാറാംതോട് പ്രദേശത്ത് ലഹരി മാഫിയകൾ നടത്തിയ അഴിഞ്ഞാട്ടങ്ങൾക്കെതിരെ സംഘടിത ജനമുന്നേറ്റം. ഗ്രാമപഞ്ചായത്തിന്റെയും പള്ളിക്കത്തോട് പോലീസിന്റെയും നേതൃത്വത്തിൽ പാറാംതോട് മുതൽ ഇളപ്പുങ്കൽ ജംഗ്ഷൻ വരെ ജനജാഗ്രത സംഗമ റാലി നടന്നു.നൂറുകണക്കിന് നാട്ടുകാരാണ് റാലിയിൽ പങ്കെടുത്തത്. തുടർന്ന് നടന്ന യോഗത്തിൽ ഗ്രാമപഞ്ചായത്ത് വൈസ് പ്രസിഡന്റ് മനോജ് ചാക്കോ അധ്യക്ഷത വഹിച്ചു.
ലഹരി മാഫിയയ്ക്കെതിരെ ശക്തമായി പോരാടുമെന്നും കുട്ടികളെയും യുവാക്കളെയും സംരക്ഷിക്കാൻ മാതാപിതാക്കൾ ജാഗ്രത പാലിക്കണമെന്നും പള്ളിക്കത്തോട് സിഐ രാജേഷ് പി എസ് ജനജാഗ്രത സന്ദേശം നൽകി.
ആവശ്യമായ എല്ലാ സഹായവും പോലീസ് നൽകുമെന്ന് അദ്ദേഹം ഉറപ്പുനൽകി.ഗ്രാമപഞ്ചായത്ത് മെമ്പർമാർ, ബ്ലോക്ക് പഞ്ചായത്ത് അംഗം വി പി റെജി, രാഷ്ട്രീയ-സാമൂഹ്യ-സാംസ്കാരിക നേതാക്കൾ, നാട്ടുകാർ എന്നിവർ റാലിയിൽ പങ്കെടുത്തു. ഗ്രാമപഞ്ചായത്ത് മെമ്പർ വി എൻ മനോജ് സ്വാഗതം പറഞ്ഞു.
