.jpg)
പുതുപ്പള്ളി: വെള്ളക്കെട്ടിൽ വീണ് 11 വയസുകാരൻ മരിച്ചു. വാകത്താനം ചക്കൻചിറ പേരുക്കുന്നേൽ ഇന്ദിരാനഗർ വാർഡ് 05 വാകത്താനം സ്വദേശി കാട്ടാമ്പാക്കിൽ ഷിജുവിൻ്റെ മകൻ മിലൻ കെ ഷിജു 11 ആണ് മരിച്ചത്.
ഞാലിയാകുഴി MG M സ്കൂളിലെ അഞ്ചാം ക്ലാസ് വിദ്യാർത്ഥിയാണ് മിലൻ. വീടിന് സമീപം ജൽ ജീവൻ മിഷൻ കുടിവെള്ള പദ്ധതിക്കായി വാട്ടർ ടാങ്കിനു വേണ്ടി കുഴിച്ച കുഴിയിൽ ഉണ്ടായ വെള്ളക്കെട്ടിൽ കുളിച്ചുകൊണ്ടിരുന്നപ്പോൾ പെട്ടെന്ന് താഴ്ന്നുപോകുകയായിരുന്നു.
വീട്ടുകാർ കുട്ടിയെ കാണാതെ തിരഞ്ഞപ്പോൾ വെള്ളക്കെട്ടിന് സമീപം ചെരുപ്പ് കണ്ടു. ഉടൻ തപ്പിയപ്പോഴാണ് വെള്ളത്തിൽ താഴ്ന്ന് കിടക്കുന്ന നിലയിൽ കണ്ടത്. ഉടൻ മന്ദിരം ആശുപത്രിയിൽ എത്തിച്ചെങ്കിലും മരണം സംഭവിച്ചു.
വാകത്താനം പോലീസും കോട്ടയം ഈസ്റ്റ് പോലീസും ആശുപത്രിയിൽ എത്തിയിട്ടുണ്ട്. മൃതദേഹം പോസ്റ്റ്മോർട്ടം നടപടികൾക്ക് ശേഷം ബന്ധുക്കൾക്ക് വിട്ടുനൽകും.
കനത്ത മഴയെ തുടർന്ന് നിർമ്മാണ പ്രവർത്തനങ്ങൾക്കായി കുഴിച്ച കുഴികളിലും താഴ്ചകളിലും വെള്ളം കെട്ടിനിൽക്കുന്നുണ്ട്. കുട്ടികളുടെ സുരക്ഷ ഉറപ്പാക്കണമെന്ന് അധികൃതർ അഭ്യർത്ഥിച്ചു.
