കൗമാരക്കാരുടെ വാട്സാപ്പ് ഉപയോഗം രക്ഷിതാക്കൾക്ക് നിയന്ത്രിക്കാം; പുതിയ പാരന്റൽ കൺട്രോളുകളുമായി വാട്സാപ്പ്
മെറ്റയുടെ ഉടമസ്ഥതയിലുള്ള ജനപ്രിയ മെസ്സേജിങ് പ്ലാറ്റ്‌ഫോമായ വാട്സാപ്പ് കൗമാരക്കാരായ ഉപയോക്താക്കളുടെ (Teen Accounts) സുരക്ഷ മുൻനിർത്തി പുതിയ പാരന്റൽ കൺട്രോളുകൾ പുറത്തിറക്കി. കൗമാരക്കാരായ കുട്ടികൾ അവരുടെ പഠനാവശ്യങ്ങൾക്കോ മറ്റോ സ്മാർട്ട്‌ഫോൺ ഉപയോഗിക്കുന്നുണ്ടെങ്കിൽ അവരുടെ വാട്സാപ്പ് ഉപയോഗം രക്ഷിതാക്കളുടെ നിയന്ത്രണത്തിലും നിരീക്ഷണത്തിലുമാക്കാൻ ഈ സംവിധാനത്തിലൂടെ സാധിക്കും.
സോഷ്യൽ മീഡിയ അഡിക്ഷനും കുട്ടികളുടെ ഓൺലൈൻ സുരക്ഷയും സംബന്ധിച്ച് ആഗോളതലത്തിൽ ആശങ്കകൾ ഉയരുകയും വിവിധ സർക്കാരുകൾ നിയന്ത്രണങ്ങൾ കടുപ്പിക്കുകയും ചെയ്യുന്ന പശ്ചാത്തലത്തിലാണ് വാട്സാപ്പിന്റെ ഈ നീക്കം.
രക്ഷിതാക്കൾക്ക് തങ്ങളുടെ കൗമാരക്കാരായ മക്കളുടെ വാട്സാപ്പ് അക്കൗണ്ട് തങ്ങളുടെ അക്കൗണ്ടുമായി ലിങ്ക് ചെയ്യാൻ കഴിയും. ഇതിലൂടെ കുട്ടി ആരോടൊക്കെ ചാറ്റ് ചെയ്യുന്നു, എത്ര സമയം വാട്സാപ്പ് ഉപയോഗിക്കുന്നു, പുതിയ കോൺടാക്റ്റുകൾ, ഗ്രൂപ്പുകൾ എന്നിവയെക്കുറിച്ചുള്ള വിവരങ്ങൾ രക്ഷിതാക്കൾക്ക് ലഭിക്കും. അപരിചിതരിൽ നിന്നുള്ള മെസ്സേജുകൾ ബ്ലോക്ക് ചെയ്യാനും രക്ഷിതാക്കൾക്ക് സാധിക്കും.
പുതിയ സുരക്ഷാ മാറ്റങ്ങൾ നടപ്പിലാക്കുമ്പോഴും വാട്സാപ്പിന്റെ എൻഡ്-ടു-എൻഡ് എൻക്രിപ്ഷൻ സുരക്ഷയ്ക്ക് മാറ്റമൊന്നുമില്ല. അതായത്, കുട്ടികളുടെ സ്വകാര്യ സന്ദേശങ്ങളോ കോളുകളോ വാട്സാപ്പിനോ രക്ഷിതാക്കൾക്കോ പുറത്തുനിന്നുള്ള മറ്റാർക്കെങ്കിലുമോ കാണാനോ കേൾക്കാനോ സാധിക്കില്ല.
കുട്ടികളുടെ വാട്സാപ്പ് ഉപയോഗത്തിന്റെ സുതാര്യത ഉറപ്പുവരുത്തുന്നതിനൊപ്പം സന്ദേശങ്ങളുടെ സ്വകാര്യത നിലനിർത്തിക്കൊണ്ടുമാണ് ഈ ഫീച്ചറുകൾ രൂപകൽപ്പന ചെയ്തിരിക്കുന്നതെന്ന് വാട്സാപ്പ് അറിയിച്ചു. കുട്ടികളുടെ സ്വകാര്യതയെ മാനിച്ചുകൊണ്ടുള്ള രക്ഷാകർതൃ നിയന്ത്രണമാണ് ഇതിലൂടെ ലക്ഷ്യമിടുന്നത്.
പുതിയ ഫീച്ചറുകൾ ഘട്ടം ഘട്ടമായി എല്ലാ ഉപയോക്താക്കൾക്കും ലഭ്യമായിത്തുടങ്ങും. രക്ഷിതാക്കളുടെ വാട്സാപ്പിലെ Settings > Parental Controls എന്ന ഭാഗത്ത് നിന്ന് ഈ സൗകര്യം ആക്ടീവാക്കാൻ കഴിയും.
📲 WhatsApp-ൽ Share ചെയ്യുക
