news updates: കാഞ്ഞിരപ്പള്ളിയിൽ ബെൻസ് കാർ തീപിടിച്ച് കത്തിനശിച്ചു; യാത്രക്കാർ അത്ഭുതകരമായി രക്ഷപ്പെട്ടു

 ഓട്ടത്തിനിടെ ബെൻസ് കാർ തീപിടിച്ച് കത്തിനശിച്ചു, യാത്രക്കാർ അത്ഭുതകരമായി രക്ഷപ്പെട്ടു.  കാഞ്ഞിരപ്പള്ളി കപ്പാട് ഗവ. സ്കൂളിന് മുൻവശമാണ് സംഭവം. തിടനാട്, പാതാഴ, കല്ലാറ്റുപറമ്പിൽ കെ ഡി സൈബാൻ എന്നയാളുടെ ഉടമസ്ഥതയിലുള്ള വാഹനമാണ് കത്തിനശിച്ചത്.സംഭവ സമയത്ത് 5 പേർ വാഹനത്തിൽ ഉണ്ടായിരുന്നു. ഓടി വരുന്നതിനിടെ വാഹനത്തിൻ്റെ ആക്സിലേറ്റർ ജാമാവുകയും മുൻവശത്ത് നിന്ന് തീയും പുകയും ഉയരുകയുമായിരുന്നു. 

വാഹനം റോഡ് വക്കിലേയ്ക്ക് ഒതുക്കിയ ശേഷം വാഹനത്തിലുണ്ടായിരുന്നവർ ഇറങ്ങി ഓടുകയും, ഇതോടെ തീ ആളിപ്പടരുകയുമായിരുന്നു.കാഞ്ഞിരപ്പള്ളിയിൽ നിന്നെത്തിയ ഫയർഫോഴ്സ് സംഘമാണ് തീയണച്ചത്. 2008 മോഡലിലുള്ളതാണ് കത്തി നശിച്ച ബെൻസ് കാർ.