72-ാമത് നെഹ്‌റു ട്രോഫി വള്ളംകളി: പുന്നമടയിലെ ആവേശപ്പോരിന് 71 വള്ളങ്ങള്‍

 ആലപ്പുഴ: ആഗസ്റ്റ് 22ന് പുന്നമടക്കായലിൽ നടക്കുന്ന 72-ാമത് നെഹ്‌റു ട്രോഫി വള്ളംകളിയിൽ വിവിധ വിഭാഗങ്ങളിലായി 71 വള്ളങ്ങൾ മാറ്റുരയ്ക്കും. ചുണ്ടൻ വിഭാഗത്തിൽ മാത്രം 22 വള്ളങ്ങൾ മത്സരിക്കും. ചുരുളൻ- 2, ഇരുട്ടുകുത്തി എ- 3, ഇരുട്ടുകുത്തി ബി-16, ഇരുട്ടുകുത്തി സി-14, വെപ്പ് എ- 5, വെപ്പ് ബി- 4, തെക്കനോടി തറ-1, തെക്കനോടി കെട്ട്-4 എന്നിങ്ങനെയാണ് മറ്റ് വിഭാഗങ്ങളിലെ വള്ളങ്ങളുടെ എണ്ണം. 

രജിസ്റ്റർ ചെയ്ത 22 ചുണ്ടൻ വള്ളങ്ങളിൽ തലവടി, വീയപുരം, അരോമ-1, മേൽപാടം, ചെറുതന, പുണ്യാളൻ നിരണം, നടുഭാഗം, കരുവാറ്റ, വെള്ളംകുളങ്ങര, ജവഹർ തായങ്കരി, സെന്റ് പയസ് ടെന്ത്, നിരണം, ആയാപറമ്പ് വലിയ ദിവാൻജി, ആനാരി, ചമ്പക്കുളം, കാരിച്ചാൽ, ആയാപറമ്പ് പാണ്ടി, കരുവാറ്റ ശ്രീ വിനായകൻ, ആർപ്പൂക്കര, ആലപ്പാട്, പായിപ്പാടൻ 2, പാർഥൻ എന്നിവ ഉൾപ്പെടുന്നു. പുന്നമടക്കായലിൽ ഓണാഘോഷത്തിന്റെ ഭാഗമായി നടക്കുന്ന നെഹ്‌റു ട്രോഫിക്കായി ആലപ്പുഴ ഇതിനോടകം ഒരുങ്ങിക്കഴിഞ്ഞു.