അർജുൻ ആയങ്കി അറസ്റ്റിൽ: കണ്ണൂരിലെ ഒളിത്താവളത്തിൽ നിന്ന് പിടികൂടി

കണ്ണൂർ: നിരവധി കേസുകളിൽ പ്രതിയായ അർജുൻ ആയങ്കിയെ രണ്ട് ദിവസത്തിലേറെ നീണ്ട തിരച്ചിലിനൊടുവിൽ പൊലീസ് അറസ്റ്റ് ചെയ്തു. കണ്ണൂരിലെ ഒളിത്താവളത്തിൽ നിന്നാണ് പിടിയിലായത്. ഉത്തരമേഖലാ ഡി ഐ ജിയുടെ നേതൃത്വത്തിലുള്ള പൊലീസ് സംഘമാണ് അർജുനെ കസ്റ്റഡിയിലെടുത്തത്. കണ്ണൂർ നഗരത്തിലെ ഒരു അപ്പാർട്മെന്റിലാണ് അർജുൻ ഒളിവിൽ കഴിഞ്ഞിരുന്നത്. ഒപ്പം സുഹൃത്തായ മറ്റൊരാളും ഉണ്ടായിരുന്നു. പൊലീസ് എത്തിയതോടെ അർജുൻ ഓടി രക്ഷപ്പെടാൻ ശ്രമിച്ചെങ്കിലും പിടിക്കപ്പെട്ടു. കണ്ണൂരിലെ കേസിൽ അറസ്റ്റ് രേഖപ്പെടുത്തിയ ശേഷം അർജുനെ എറണാകുളത്തേക്ക് മാറ്റിയേക്കും.

 ക്രമസമാധാന ചുമതലയുള്ള എ ഡി ജി പിയുടെ നിർദേശപ്രകാരമായിരിക്കും തുടർ നടപടികൾ. നേരത്തെ കോതമംഗലത്തിന് സമീപം ക്രിമിനൽ പ്രവർത്തനങ്ങൾക്കായി സംഘം ചേർന്നെന്ന സംശയത്തിൽ അർജുനെയും കൂട്ടാളികളെയും പൊലീസ് കസ്റ്റഡിയിലെടുത്തിരുന്നു.

 ജാമ്യത്തിലിറങ്ങിയ ശേഷം റെയ്ഡിന് നേതൃത്വം നൽകിയ കോതമംഗലം ഇൻസ്പെക്ടർക്കും ഊന്നുകൽ എസ് എച്ച് ഒയ്ക്കുമെതിരെ ഇൻസ്റ്റഗ്രാമും ഫേസ്ബുക്കും വഴി ഭീഷണിയും അധിക്ഷേപവും നടത്തിയതിന് പൊലീസ് കേസെടുത്തിരുന്നു. ഹൈക്കോടതി മുൻകൂർ ജാമ്യാപേക്ഷ തള്ളിയ ശേഷവും ഒളിവിലിരുന്ന് പൊലീസ് ഉദ്യോഗസ്ഥരെ വെല്ലുവിളിച്ചതാണ് തിരച്ചിൽ ശക്തമാക്കാൻ കാരണമായത്.